ኢሕአፓ: በእስልምና ዕምነት ተከታይ ወገኖቻችን ላይ እየተፈጸመ ያለው ግፍ በአስቸኳይ ማክተም አለበት

ኢሕአፓ (ዴሞክራሲያዊ)/EPRP – Democratic – የአምባገነን መንግሥት መገለጫ ባህሪያቱ ከዕለት ዕለት ጉልህ እየሆኑ ሲመጡ መሻሻል ወይም መለወጥ ከቶውንም አይጠበቅበትም። በመሆኑም ነው በደቡብ ወሎ፤ በደጋን እና በገርባ ከተሞች በእስልምና ዕምነት ተከታይ ወገኖቻችን ላይ ጥቅምት 11 ቀን 2005 ዓ. ም (October 21, 2012) የተፈፀመው ግድያ፤ ድብደባና እስራት የህወሓት/ኢህአዴግን ፀረ-ሕዝብ ባህሪና አምባገነናዊነት መልሶ ያረጋገጠው። የአካባቢው የእስልምና ሃይማኖት ተከታዮች ገርባ ከተማ ለጸሎት በተሰባሰቡበት ሰዓት የፀጥታ ኃይሎች በበርካታ ወገኖቻችን ላይ የግፍ እርምጃ በመውሰድ ሞት፤ መቁሰል፤ መደብደብንና መፈናቀልን አድርሰዋል።

ኢሕአፓ (ዴሞክራሲያዊ) ይህንን ኢ-ሰብዓዊ የዕብሪት እርምጃ በጥብቅ ያወግዛል። የእስልምና ዕምነት ተከታይ ወገኖቻችን የዕምነት መብታቸውን ለማስከበር፤ ህወሓት/ኢህአዴግ እመራበታለሁ የሚለውን ሕገ-መንግሥት አክብረው፤ የመጅሊስ  ምርጫና ዕምነታቸውን በነፃነት ለማስፋፋት በሚያደርጉት ሰላማዊ ትግል ህወሓት/ኢህአዴግ ጣልቃገብነቱንና ለጭፍጨፋ ሰበብ ፍለጋ የሚያደርገውንም ትንኮሳ ኢሕአፓ (ዴሞክራሲያዊ) በጥብቅ ይቃወማል። ወገኖቻችን በህወሓት/ኢህአዴግ ሕገ-መንግሥት አንቀጽ 27 ውስጥ ተፈቅዷል ከተባለው መብት አልፈው የፈጸሙት ህገ-ወጥ ተግባር ሳይኖር፤ የመንግሥትን ጣልቃገብነት ስለተቃወሙ ብቻ ማሳደድ፤ ማሰር፤መደብደብና መግደል የአምባገነኑን መንግሥት ግፈኛነት በግልጽ ከማሳየቱም በላይ በአፋኝ አገዛዙ የመቀጠል ፍላጎቱንም ያረጋግጣል።

ሁሉን ባስደነቀ መልኩ ወገኖቻችን ከአሥር ወራት በላይ ፍፁም ሠላማዊ በሆነ መንገድ ላነሷቸው የመብት ጥያቄዎች አግባብ ያለው ምላሽ ከመስጠት ይልቅ ሰላማዊውን ትግል  ፈር ለማሳት በተቀነባበረ መንገድ “ሠላምን እንደ ፍርሃት፣ ዝምታንም እንደ ሽንፈት”  የሚያየው ዕብሪተኛው የህወሓት/ኢህአዴግ መንግሥት ሰላማዊ ምዕመናኑን በመካነ-መስጂዳቸው ውስጥ እየገባ መግደልንና ማቁሰልን መረጠ። የእስልምና እምነት ተከታይ  ወንድሞቻችንና እህቶቻችንን የህወሓት/ኢህአዴግን ትንኮሳ አክሽፋችሁ በሰላማዊ መንገድ  የዕምነት መብታችሁን ለማስከበር በምታደርጉት ትግል ላይ ኢሕአፓ (ዴሞክራሲዊ) ምንጊዜም ከጎናችሁ እንደሚቆም ሊያረጋግጥላችሁ ይወዳል።

ህወሓት/ኢህአዴግ በኢትዮጵያ ኦርቶዶክስ ተዋህዶ ቤተክርስቲያን ዕምነት ፓትሪያርክ እስከመምረጥና ቀኖናን እስከማሻር ጣልቃ በመግባት፤ በቅርቡ ደግሞ ገዳማትን  በመድፈርና መነኮሳትን በማሳደድ እየፈፀመ ካለው አሳፋሪ ተግባራቱ መታቀብ አለበት እንዳልነው ሁሉ አሁንም በቤተክርስትያን ተቋማት ውስጥ ጣልቃ ገብነቱ በአስቸኳይ ማቆም አለበት እንላለን። የክርስትናና የሌሎች ዕምነት ተከታዮች ሁሉ የህወሓት/ኢህአዴግ መንግሥት ኢትዮጵያውያንን በብሄረሰብ ከፋፍሎና አቃርኖ ለማፋጀት እንደሞከረው፤ አሁንም በሃይማኖት ሊከፋፍልና ሊያጋጭ እየጣረ መሆኑን ልናስተውል ይገባል።

የእስልምና ሃይማኖት ተከታይ ወገኖቻችን በሚያደርጉት ትግል ላይ እንደታየው  ህወሓት/ኢህአዴግ በሕዝቡ ውስጥ ጥርጣሬና ጥላቻ እንዲኖር እያደረገ ያለውን ጥረት  በሀገራዊ የአንድነት ስሜት በመገንዘብ፤ ከእስልምና እምነት ተከታይ ወገኖቻችን ጎን በመቆምና በመታገል የህወሓት/ኢህአዴግን ተንኮልና ደባ ልናከሽፍበት ይገባል እንላለን።

በተለያዩ ወቅቶች ክርስቲያን ወገኖቻችን ያነሷቸው ጥያቄዎችም ተመሳሳይ የዕምነት ነፃነት  ጥያቄዎች ነበሩ፤ አሁንም ናቸው። የክርስትናም ሆነ የእስልምና ዕምነት ተከታዮች  ያነሷቸው ጥያቄዎች ተገቢ ናቸውና ትክክለኛ ምላሽ ያገኙ ዘንድ የኢትዮጵያውያን ሁሉ የተባብረ የትግል አንድነት ያለጥርጥር አስፈላጊ ነው። ስለዚህ እጅ ለእጅ ተያይዘን በመታገል የጋራ በሆነችው ሀገራችን ውስጥ መብቶቻችንን ልናስከብር ይገባል እንላለን!!

የዕምነት ነፃነት መብታቸው እንዲከበር በመጠየቃቸው የታሠሩት ይፈቱ!! በኢትዮጵያውያን የጋራ ትግል የዕምነትና ሌሎች መብቶቻችንንም እንቀዳጃለን!!